التعميم لغة الجهلاء
التعميم لغة الجهلاء ، وعشان لا تصير جاهل لا تعمم على الشعوب لمجرد موقف او اثنين حصلوا لك في السفر وايضا العنصرية شيء مقيت ، فموضوع انك تشوف حالك على الاخرين ، انا ما اسافر هذي الدولة ريحتهم خايسه وانا ما اروح هالمكان اشكالهم ما تعجبني.
الله يقول في القران { يَٰٓأَيُّهَا ٱلنَّاسُ إِنَّا خَلَقْنَٰكُم مِّن ذَكَرٍۢ وَأُنثَىٰ وَجَعَلْنَٰكُمْ شُعُوبًا وَقَبَآئِلَ لِتَعَارَفُوٓاْ ۚ إِنَّ أَكْرَمَكُمْ عِندَ ٱللَّهِ أَتْقَىٰكُمْ ۚ إِنَّ ٱللَّهَ عَلِيمٌ خَبِيرٌ }
الفترة الي راحت قاعد اشوف مشاهير يدعون انهم يفهمون في السفر يتكلمون عن نصائح للسفر او ايا كان مسمى كلامهم
مختصر كلامهم سافر عشان تقعد في الفندق وتروح المكان السياحي ولا تكلم احد ولا تطالع احد
انا باتكلم عن تجاربي الشخصية وفيه تجارب كثيرة غيري :
سافرت فرنسا وقالوا لي الفرنسيين شايفين حالهم وما يساعدون احد ولا يتكلمون الا لغتهم
واول يوم وصلت ضايع ومو عارف احصل السكن الي حاجزه وساعدوني فرنسيين وصلوني لمكان السكن وبدون لا يشوفون حالهم علي وبدون لا يتكلمون انجليزي ولا اتكلم فرنسي
سافرت تركيا
وتعرضت لاشكال من النصب المختلفة وكل مرة انصح احد بنوع النصبة الي صارت لي يطلعون بنصبه جديدة لكن هل كل الاتراك نصابين ؟ لا طبعا
مرة من المرات طلبت تاكسي مشوار بعيد وقال لي سعر المشوار ، ولما وصلنا كان العداد تعدى السعر المتفق عليه ، فأنا عطيته المبلغ الي طلع في العداد ، لكنه رجع لي المبلغ واخذ المبلغ الي قال لي عليه وهو ما يتكلم الا تركي بس
رحت مصر وحاول بعض الاشخاص يستغلوني في الاماكن السياحية لاني خليجي ، لكن بالمقابل حصلت ضيافة في اماكن اخرى لاني خليجي بعد
في جنوب افريقيا من اول يوم كنت مستأجر سيارة ، رحت اتعشى ورجعت الا نافذة السيارة مكسورة باق اشياء تافهة ، لكن لما رجعت السكن وتكلمت مع موظف الاستقبال قعد يعتذر لي عن الموقف كانه صار لي الموقف جنبه وما قدر يساعدني ، يعني معقولة بس اطالع ان انسرقت السيارة واترك موقف الموظف معاي ؟
مختصر الكلام في كل مكان فيه الزين وفيه الشين ، اذا شفت شي ما عجبك ابتعد عنه ولا تعمم هذا الفعل على الشعب باكمله واذا مصر انك تعمم ، عمم الاشياء الجميلة الي شفتها بعد
واذا بتقدم نصائح قدم اشياء مفيدة حقيقة مو رأيك الشخصي تسويه نصيحة يعني مثال لنصيحة مفيدة جورجيا ممنوع البندول فيها وممكن تسجن
لا تسافر هذا المكان اذا ما تحب البرد هذي نصيحة مقبولة لكن لما تقول لا تسافر هذا المكان في الشتاء هذي نصيحة مبهمة وممكن تكون خطأ يعني ممكن انا احب هذي الاجواء ؟
فالاخير هذا الكلام للشخص الي يحب يسافر ويكتشف ويتعرف على الاخرين ، اما الي يدور سياحة فاخرة ويسكن في اماكن فاخرة ويتنقل بسيارات فاخرة وينزلونه عند بوابة المكان السياحي ويفرشون له السجادة الحمراء هذا الكلام بعد له عشان لا يعمم التوافه الي تصير له على كامل الشعب والدولة الي رايح لها
تعليقات
إرسال تعليق
وش رايك في الموضوع؟